حسان بالواعر متأثرا :”هلال رمضان ما طلعش في دارنا.. القمرة أمي رحلت وهزتو معاها” (فيديو)

حسان بالواعر متأثرا :”هلال رمضان ما طلعش في دارنا.. القمرة أمي رحلت وهزتو معاها” (فيديو)

 

نشر الإعلامي بقناة نسمة حسان بالواعر تدوينة مؤثرة جدا على حسابه الخاص عبّر فيها عن ألمه وتأثره في أول شهر رمضان دون والدته الراحلة، موجها لها كلمات مؤثرة أثارت تفاعل رواد صفحات مواقع التواصل الإجتماعي حيث قال :

قمرتي مشات.. و هزت الهلال معاها ..

غدوة رمضان .. اي نعم رمضان ..و ما اندراك من رمضان بالنسبة لينا ..الشهر اللي كنا نحضرولو ليل ونهار.. تقولش عام كامل عايشين نستناو فيه ..

صحيح كنا نعديوه واحدنا .. اما انت وحدك بالنسبة لي لمة ..انت وحدك عايلة .و اصحاب .انت وحدك برشة ناس ..انت وحدك كنت بالنسبة لي كل الناس.

صلوحة غدوة رمضان ..
تتذكر كيفاش نبدا هابط طالع للبلاد نقضيلك ..و نشريلك..
و انت قبل بجمعتين تبدل الماعون و كان لزم تدهن الكوجينة .. و تحضر الافاح و القهوة و تهز ترحيهم في الطاحونة ..
نتذكر ريحة القهوة بقشور البرتقال و هك الشي اللي تخلطو فيها .. كيفاش تبدا فايحة وقت تروح بيها . . تقول ناكلها بالمغرفة .تتذكر كيفاش كي كنت تكثر علي بالقضيات ..نفد و نقلك رانا زوز ..علاش هذا الكل ..و انت طلعت تفرق فيها شكاير .. عاللي يستحقه ..
قداش حنين هك القلب .. قداش نحبه .. و نحب مولاته ..
تو اكثر من 20 سنة ..menu النهار الاول ما تبدلش ..غدوة لا ثمة menu لا طاولة ..الهلال ما طلعش في دارنا ..القمرة رحلت و هزتو معاها ..نتذكر النهار الاول كيفاش نبدا شادد الصف بش ناخولك حاجة حلوة .. و اش تتشرط و تتشهى .. و بعد ما تاكل شي .
و الدقلة .. تحبها كان الباهية و تحط فيها شامية و زبدة . على خاطري و انت اصلا ما تاكلش الزبدة ..نتذكر كيف تبعثني نشد الصف بس ناخولك اللبن و الجبن ..
 صفرتك كيفاش تبدا مزية و مبرقشة ..على كل لون يا كريمة ..
عينك كبيرة و تحب الحاجة المزيانة . و الطاولة لازمها تشهي الصايم بش يشق فطرو مليح ..

صلوحتي ..
تتذكر خرجاتنا في الويكند.. نقلك اكاهو .يزيك ما تعبت وسط الجمعة ..ارتاح سبت و احد و نبداو نختارو في الرستورون .. و نمشيو و نعملو جو و ضحكة .. لا عاد جو ..لا عاد ضحكة ..
صليحة غدوة رمضان ..و انت ماكش معايا ..
لشكون بش نقضي و شكون بش يصنف
و هك الخبز العربي اللي تعمله و ترش عليه جلجلان و سينوج و تحط فيه الزوزة . بنتو لتوه في فمي ..
و وقفتك في الكوجينة ..و وهرتك و طلتك .. و كي تهبل علي ..هيا اخطاني ..ابعدني . برا قيل ..و اخرج من كوجينتي ..

صليحة ..
تتذكر في اليل كيفاش نبداو نحطوا في ليستة الشواهي ..و انت تبدا حايرة ..تقلي تعبت ..شنوة بش نطيب ..
صليحة..
افيم سدر بالليمون و الكعابر .. ما يعرف سره كان انت ..
و شربة حوت راسكاس ….. و رشة نعناع اخضر شايح فوق الحلالم ..
يا صليحة كل حاجة بنينة وفات معاك .
ما بقى في الدنيا كان طعم المرارة .و الدموع مالحة كي تهبط في الحلق …

يا صليحة ..
تتذكر كيفاش نشيخ عليك وقت الاذان ..نقلك اكاهو انا نخدم في تونس بش نشق فطري مع اذان التلفزة و انت تهبل و تقلي اصبر شوي ..مازالكش تو ..
و الا كيفاش ساعات نطلعو فوق السطح بش نتفرجوا في المدفع يضرب ..
و كيفاش تحب تحط القرآن بالقوي في الكوجينة اخر العشية ..

يا صليحة ..
مع شكون بش نلعب طرح رامي بعد شقان الفطر ..و قهوتنا مفوحة بالزهر ..و كعبات حلو ..و طرف هريسة حلوة ..و الا البسبوسة اللي تعملها ..تذوب ذوبان في الفم ..
ارجع برك ..و نخليك تربح ..و ماعادش نسرق الجوكارات و ما نعملكش رقصة التنين المجنون كي نفشخك في طرح …
و الكنافة حقا ..يا حسرة ..كيفاش كنت توسع بالك ..و تقلب و تشقلب و تشحرها ..و تطلع تهبل بالبنة ..

صليحة
شكون بش يمرجني في الليل ..حسان قوم اتصحر ..عيش ولدي ..تحبش نطيبلك درع و الا كريمة ..
تي برا اعمل حتى قهوة . تي اشرب كاس حليب ..
تبدا ورايا .انا اللي ما نحبش نتصحر…تشدلي راسي حتى لين نتصحر بالسيف ..
ها صليحة ..
شكون بش يقيمني في القايلة ..هيا قوم برا اعمل شوي سبور ..بش تجي تعاوني في حطان الصفرة ..شكون ..شكون ؟
و برا عادة ..في النص الثاني
شكون بش يبدا يميل في راسه و يحضر في الحلو .. هك المقروض اللي يذوب في الفم .. و هك الغريبة ..و الكعك..
و لشكون بش نشري حوايج العيد .. و ندلل .. و انت عادة ديما تحب لبستين ..
و نهار العيد مفاوضاتنا هالمهبة .لا زيدني شوي ..
ياخي جيتك نطلب انا .. مشي حويجة باهية و الا خلي فلوسك عندك ..
ارجع برك يا صليحة و خوذ الفلوس الكل ..
نتذكر كيفاش كي نروح من صلاة العيد .نلقى قهوتي سخونة و صحين حلو مرمرم و نشيخ بوس و تعنيق و دعاء خير ..
و انت تبدا تستنى في حق الملح ..

يا صليحة ..
ملاحت الدنيا بعدك .. ماعاد فيها شي حلو . حتى هو ماالي مشيت السكر تقطع . مالبلاد ..
يا ..ياااا
غدوة راهو رمضان ..
قاعدين يهنيو في و يبعثولي رمضانك مبروك ..
راهو كل شي وفا ..لا عاد مبروك ..لا عاد سنين دايمة ..
لا عاد رمضان ..
الايمات ولات كيف كيف..وجيعة و عذاب ..
تتشابه برك في مرارتها .
انت كنت الحاجة الحلوة في اياماتي ..انت كنت البنة في حكاياتي ..
انت كنت العسلة في رواياتي …و ليلي و صباحاتي ..

يا صليحة ..
ماك تعرف البي هزيت معاك القلب و الروح ..
اما راك هزيت زادة الفرحة و البهجة ..

يا صليحة ..
ما نعرفش كان عندكم رمضان الفوق ..كان عندكم رمضانك مبروك وين انت..
اما الهنا ..راهو ماعنديش رمضان ..كل شي وفا من نهار اللي مشيت
توحشتك يالحب ..توحشتك يا ..توحشتك شاكيرا..توحشتك أمي .
يرحمك يا عمري …”

الفيديو : 👇👇👇👇👇👇