طريقة إعداد عصيدة الزقوقو

طريقة إعداد عصيدة الزقوقو

بمناسبة المولد النبوي الشريف،نقدم لكم اليوم طريقة إعداد عصيدة الزقوقو في المنزل بطريقة سهلة و بسيطة، فقط كل ما عليكم هو اتباع الخطوات التالية:

المكونات :
1كغ زقوقو
700 غ سكر (اذا ماتحبهاش حلوه تنجم تنقص الكميه كل حد وذوقو للانو العصيده متاع زقوقو بنتها في حلاوتها ماتجيش ماسطه اما راهو اللون الأكحل الغامق يجي من صبان السكر و حلاوتها )
700 غ فارينة
3 لتر ماء
الكريمة:
نشاء
حليب
2 اصفر عظم
نصف حكه حليب مركز محلى
سكر
سكر فانيليا او قطرات ماء زهر

طريقة التحضير :
يتنقى الزقوقو نعرجوه شوية و يترحى مليح في رحاي لحم او في الطاحونة باش يسيب الزيت الي فيه و هذي خطوة اساسية او تشريه مرحي حاضر من نوعية جيدة
من بعد ما ترحيه تحلوا في الماء الي مقدر ب 2 لتر فقط تخلطو فيهم بالباهي و تخليه يرتاح شوية باش يدخل فيه مليح

تصفيه في غربال شعر رقيق بالباهي و الي يبقى في الغربال تعاود تخلطو في اللتر متاع الماء الي خليتها مقدار الي تستخرجو مالتصفية الثانية و تضيفو ل 2 لتر الي صفيت فيهم التصفية الاولى تزيد عليه الفارينة و تخلطو مليح كان تحب في خلاط كهربائي باش يذوبو الكعابر و تعاود تصفيه
و تحطهم على النار و تبقى تحرك في نفس الجهة ما تبدلش المسارباش ما تتحلش العصيدة و تجي متماسكة و ملبنة و انت تطبخ فيها ما تخافش باش تعملك كعابر لازمها برشا تعصيد يذوبو الكعابر و ترجع صافية حتى لين تولي تخرج في كريات هواء كاينها تغلي .. في الوقت هذا تزيد السكر بالشوية بالشوية تو تشوف انو اللون ولا اسود ما شاء الله (وهذه هي الطريقه المعروفه يعني تحط كان 3 لتر ماء فقط و السكر تزيدو في الاخر كيما الاغلبيه تعمل لكن الطريقه هذي تخلي العصيده تجي كحله بالباهي )و ترجع العصيدة روعة تزيد تبقى تعصد حتى تاخذ غلوة صغيرة و هكا تكون العصيدة حاضرة تحطها في الصحافي

الكريمة العربي :

تحط لتر و نصف حليب يسخن عالنار و تاخذ صحفة تحل فيها 3 او 4 مغارف نشاء مع شوية حليب و 2 اصفر بيض تخلطهم و تزيدهم للحليب بالشوية و تحرك حتى تولي كريمة و تزيدها الحليب المركز ( اختياري فما الي ما يستعملش الحليب المركز) و السكر حسب الذوق و الي يحب سكر فانيليا او قطرات ماء زهر للطعم و تصبها في الصحفة على العصيدة
وهكذا تكون العصيدة حاضرة للتزيين
و ان شاء الله عيد مولد مبروك على الجميع