عربية حمادي: الليلة …ما تنساوش الحنة..

عربية حمادي: الليلة …ما تنساوش الحنة..

كتبت: عربية حمادي

أمّي الله يرحمها و الله يرحم موتاكم كانت تحبّ الحنّة برشا و كانت تقريبا في كلّ المناسبات تحنّي و تحنّيلي معاها و كيف كْبِرْتْ و لّيت أنا في كلّ المناسبات إلّي نحنّيلها الله يرحمها…

ونشيخ عليها بالضّحك كيف تتقمّط للصّباح و يكثر عليها الحكاك هاو ظهرها هاو خشمها هاو راسها… وهي ما تنجّمش تحكّ على خاطر إيدها ملفوفين بالقطن والمحرمة و الحنّة
قبل كنّا نباتو بالحنّة و تتنحّى الصّباح مش نعملوها ساعة و تتنحّى

المهمّ في جانفي 2007 توفّت أمّي الله يجعلها من أهل الجنّة و قبل ما تتوفّى و هي على فراش المرض حنّيتلها و جتها حنّة تهبّل فرحت بيها برشاااا و كيف توفّت زدت حنّيتلها قبل ما نكفّنها و من وقتها ودّعت الحنّة معاها و ما حنّيتش يعني أكثر من 14 عام حتّى كيف جبت بنتي ما حنّيتش رغم إنّي شتيهيتها عاللّخر
عندي توّا أكثر من جمعتين ولّيت نرقد و نقوم نشمّ

ريحتها في إيدي
و كيف سئلت قالولي لازم تحنّي
و أوّل ما تحطّت الحنّة في إيدي تذكّرت وجهها و ملامحها و لمحة عينيها وقت كنت نحنّيلها
أمّي الله يرحمك و الله يصبّرني على فراقك والله يقابلني بيك يوم الدّين

إلّي باش يقرا التّدوينة و يستغرب أو يقلّي و نحنا آش دخّلنا تحكيلنا نحبّ نقلّو كتبتلك ها التّدوينة باش نذكّرك بقيمة والديك إلّي ممكن اللّيلة تنساهم أو تكون أساسا ناسيهم…حبّيت نقلّك تذكّرهم و عيش كلّ اللّحظات معاهم و كلّ التّفاصيل قبل ما يجي نهار تبكي على لحظة ما عشتهاش بكلّ تفاصيل تفاصيلها
عامكم مبروك سعيد⚘️