الغنوشي : حفظ الله الجميع … اللّهم انّي بلغت..

الغنوشي : حفظ الله الجميع … اللهم انّي بلغت..

كتب المهندس بالرصد الجوي محرز الغنوشي :

🚨🚨 إلى متى هذا الاستهتار؟!
وبربي وين ماشيين؟؟

كلموني برشا أولياء.. واللي نسمع فيه ما عادش يتقبل السكوت..
إحنا في موجة حر استثنائية، درجات حرارة فوق المعدلات بفارق كبير، وتحذيرات من مخاطر التعرض للحرارة والمجهود البدني.. ومع هذا، فما تدريبات ومباريات رياضية تتعمل في الشمس، وبعضها لأطفال وناشئين..
معناها في 50 سخانة الطفل يترانا والا يلعب في ماتش باش مولى النادي يدخل الفلوس والجامعات الرياضية تقيد علينا نشاط..
راهو هذا يرتقي إلى الاجرام في حق الطفولة..

بالله عليكم في شنوّة تستناو؟!
تستناو الطفل يطيح؟
تستناو ضربة شمس؟
تستناو حالة استعجالية؟
ولا لا قدّر الله تستناو فاجعة باش وقتها تبدأوا تسألوا شكون المسؤول؟؟

– المباراة موش أهم من الطفل..
– البطولة موش أهم من صحة الصغير..
– الرزنامة الرياضية موش قرآن منزل..
تتبدل.. تتأجل.. تتوقف..
أما صحة الطفل إذا تضرّت، ما ترجعش بالرزنامة..

وإذا بعض الجامعات الرياضية ما عندهاش الجرأة باش توقف أو تأجل الأنشطة في ظروف مناخية استثنائية، هنا يجي دور سلطة الإشراف..

⚠️ وزارة الشباب والرياضة مسؤولة على التدخل..
موش معقول نلقاو وزارة التربية تتدخل في الظروف الجوية الاستثنائية وتعلّق الدروس لحماية التلامذة، وفي المقابل بعض الأنشطة الرياضية للأطفال تتواصل تحت الشمس وفي موجة الحر وكأنو ما فما حتى خطر..

وين سلطة الإشراف؟
تتفرج؟؟
لا يا سادة..
وقت اللي الخطر واضح، السكوت ما عادش ينجم يتفسر على أنه حياد..
ونحمّل المسؤولية بوضوح :
أي جامعة رياضية، نادٍ أو جهة منظمة تواصل أنشطة الأطفال في ظروف حرارية خطيرة، عليها مسؤولية كاملة على سلامة المشاركين..

ونقولها لوزارة الشباب والرياضة بكل وضوح..
تدخلوا توّا.. موش بعد ما تصير الكارثة..
أصدروا بلاغًا رسميًا..
وجّهوا الجامعات والأندية..
علّقوا الأنشطة الخارجية للأطفال خلال ذروة موجة الحر..
وافرضوا إجراءات واضحة..

خاطر الطفل اللي يدخل للملعب يلزم يرجع لدارهم سالم..
موش يرجع محمول للاستعجالي..
عيب علينا في 2026 مازلنا نستناو المصيبة باش نفهموا معنى الوقاية..

🚨 الرياضة تتأجل.. البطولة تتأجل.. المباراة تتعاود..
أما حياة وصحة أطفالنا ما تتعاودش..
اللهم اني بلغت..
والسلام..