أخبار وطنية

بعد صور سهرته الليلية، زكرياء بوقيرة يوضّح

رد الدكتور زكرياء بوقيرة على الصور التي تم التقاطها له أثناء تواجده بإحدى السهرات الليلية دون كمامة ووسط عدد كبير من الأشخاص ضاربا بعرض الحائط الإجراءات التي لطالما دعا إليها خاصة دعوته المتكررة لحجر صحي شامل وعدم الخروج من المنزل.

وعرّضت هذه الصور بوقيرة إلى حملة واسعة من الانتقادات خاصة من قبل الاولياء الذين اتّبعوا نصائحه ببقاء أبنائهم بالمنزل دون دراسة ليجدوه في سهرة ليلية دون احترام للبروتوكول الصحي.

وفي تدوينة له قال بوقيرة إن هذه الانتقادات أوجعته وأبكته قائلا “الناس الكل نهشتلي اعظامي ..البارح نهار كامل نبكي بالشهقة ..اي نبكي..انا انسان بكاي وما نحشمش بش نقولها.. أنا حساس..”

وجاء في نص التدوينة:

“خذاولي تصويرة وانا نتعشى

مشيت وقتها ناخو في بيدزا قبل ما نمشي للتلفزة

عملو منها قضية الشرق الأوسط ردو فما طفلة طردتني وكل واحد يزيد من عندو

بالرغم اني ما خالفت حتى بروتوكول والدليل اني نهارتها في المباشر على تلفزة تي في،  الناس الكل نهشتلي اعظامي

البارح نهار كامل نبكي بالشهقة ..اي نبكي

انا انسان بكاي وما نحشمش بش نقولها

الله غالب من الي صغير حساس بزايد نسخف على العباد على القطاطس تي حتى الناموس يسخفني وما نحبش نستعمل الفليتوكس

هذا انا وممكن هذا لواش قعدت مكبش في سياسة ما تعجبش صحيح اما تمنع العباد

البارح حسيتها بااااااااارشا

ما عندكمش فكرة قداش وجعوني ..ما نحبش نوريكم اما راني نحس

راني نقراهم الكمنتارات الكل متع الغراب متع البومة ومتع السبان

حتى البلوك قليل وين نستعملو خاطر يسخفوني العباد ونلوم روحي كان تصيرلهم حاجة خاطر انا قصيت عليهم المعلومة

حاولت نتحمل على روحي من غير ما نوريكم

حاولت نشد صحيح ونكبش ..اما راهي تصعاب ساعات

تصعاب بااااااااارشا ..ليوم خير شوية حمدوله

موش بش ينجمو يوقفوني ..موش بش ينجمو يرهبوني

وعدتكم اني بش نواصل لآخر لحظه مهما كان الثمن

هذا هو الثمن ليا انا ..حكاية فارغة قدام شنوة صار في العباد من الفيروس

الي نعمل فيه موش لروحي

الي نعمل فيه على خاطركم

ما رخيتش قبل وموش بش نرخ توة

خاطر عارف شنوة بش يصير في الشعب كان الدولة تواصل في سياسة الموت”

زر الذهاب إلى الأعلى

أنت تستخدم إضافة Adblock

‎يُرجى السماح بعرض الإعلانات على موقعنا الإلكتروني ‎يبدو أنك تستخدم أداة لحظر الإعلانات. نحن نعتمد على الإعلانات كمصدر تمويل لموقعنا الإلكتروني
ن